حجاب کے پیچھے جنگ میں کیا ہے ۔۔؟

 حجاب کے پیچھے جنگ میں کیا ہے

تحریر: ڈاکٹر لیلی حمدان   

اردو ترجمہ: مائزہ خان بنوری  

نقاب کے خلاف جنگ کے پیچھے کیا ہے ۔؟ 

جہاں کہیں تم برہنگی کی دعوتیں دیکھو، سمجھ لو کہ وہ شیطان کی طرف سے ہیں۔ اللہ تعالیٰ فرماتا ہے:

"اے آدم کے بیٹو! شیطان تمہیں فتنے میں نہ ڈال دے، جیسے اس نے تمہارے والدین کو جنت سے نکالا، ان سے ان کا لباس اتار دیا" (الاعراف: 27)۔

یہ منافقین فحاشی اور حیوانیت سے نہیں چِڑھتے، ان کا اصل مسئلہ فضیلت اور حیا ہے۔ اسی لیے مومن عورتوں کا اپنے نقاب پر ڈٹے رہنا ان کے لیے باعثِ جلن ہے، اور وہ اس پر اجر پاتی ہیں۔

نقاب نے آزادی کے نعروں اور خواتین کے حقوق کے جھوٹے دعووں کو بے نقاب کر دیا ہے۔ جو لوگ آزادی کا راگ الاپتے ہیں وہ پردے کی بات آتے ہی غصے سے پھٹ پڑتے ہیں! اور جو خواتین کے حقوق کی بات کرتے ہیں، وہ نقاب کے حق پر ناک بھوں چڑھاتے ہیں! یہ روز روشن کی طرح واضح حقیقت بتاتی ہے کہ وہ کس قدر الجھن اور سرکشی کا شکار ہیں — اور یہ بھی کہ وہ دراصل کن چیزوں کے دشمن ہیں! ان کے مقابلے میں مومن عورتوں کا نقاب پر استقامت باعثِ عزت ہے۔

ایک بحث میں، ایک امریکی، آزاد خیال اور پیچیدہ ذہن کی حامل خاتون ڈاکٹر سے بات ہوئی، جو خواتین کے برہنہ ہونے کے حق، سڑکوں پر جانوروں کی طرح گھسیٹے جانے کے حق، اور عوام کے سامنے استحصال کے حق کی مدافع تھی! مگر جب بات اس پر آئی کہ عورت اپنے جسم کو ڈھانپے — تو یہ خیال ہی اسے خوفزدہ کر گیا! یہ فطرت سے شدید انحراف ہے، اور ہمیں اس زوال اور پستی کو قبول کرنے پر مجبور نہیں کیا جا سکتا۔

آج مسئلہ فاسد مغرب نہیں ہے — ان کی دعوتِ فحاشی، فطرت سے بغاوت، اور اخلاقی بربادی سورج سے زیادہ روشن ہے — اور کوئی بھی معتدل نفس یا باشعور عقل ان کی باتیں قبول نہیں کر سکتی۔ بلکہ حقیقت یہ ہے کہ خود بہت سے مغربی لوگ ان کی ان انتہاؤں اور فطرت دشمن قوانین سے خوفزدہ ہیں! اصل مسئلہ اندرونی دشمنوں کا گروہ ہے — طابورِ ششم۔

ہمارا المیہ ان متکبر، مغرور، کینہ پرور اور اسلام سے بغض رکھنے والے لوگوں سے ہے، جو مغرب کی خدمت کو باعثِ شرف سمجھتے ہیں۔ وہ مغرب کے تلوے چاٹنے والے غلام ہیں، مگر مغرب کے لیے بھی بے وقعت، محض ایک ذلیل مخلوق جو ان کے قدموں میں پڑی ہے کہ شاید دنیا کا کوئی ٹکڑا مل جائے! ان کے نفس پست، عزائم گھٹیا، مگر پھر بھی انہیں منبر، اثر، اور رسائی حاصل ہے — اور مصلحین کو بدترین مخالفت کا سامنا کرنا پڑتا ہے۔

مجھے نہیں لگتا کہ کوئی غیرتمند مرد یہ پسند کرے گا کہ اُس کی بیوی یا بیٹی بے پردہ ہو — جیسے کوئی عام شے ہو۔ نہ ہی کوئی صاحبِ عقل یہ انکار کرے گا کہ نقاب عورت کی عظمت، حیا اور عفت کی حفاظت کرتا ہے، اور فتنہ پرور نگاہوں اور عزت کے لٹیروں سے بچاتا ہے! اور جو عورت نقاب پہن کر اس کے فائدے جان چکی ہو، وہ ہرگز اس سے دستبردار نہیں ہو سکتی! مگر افسوس کہ جاہل عورتوں کو منبر پر بٹھایا گیا ہے اور باپردہ خواتین کو “شیطان زدہ” قرار دینے کا بڑا مکارانہ کھیل جاری ہے۔

یہ احمق لوگ نقاب کی فرضی “خرابیاں” گنوانے میں لگے ہیں، حالانکہ زمانۂ جاہلیت تک میں ایسا خبث اور ذہنی بیماری نہ تھی! لیکن ان سے کبھی کوئی فحاشی، بے حجابی اور مخلوط زندگی کے نقصانات نہ پوچھے گا، جن کی یہ دن رات دعوت دیتے ہیں۔ یہ لوگ برائی کا حکم دیتے ہیں، اور اگر کوئی بھلائی کا علم اٹھائے، تو اس کے خلاف جنگ چھیڑ دیتے ہیں۔ یہ شروع سے ایمان اور کفر کی جنگ ہے، اللہ کے لشکر اور شیطان کے لشکر کی جنگ ہے۔

یہ مت سمجھو کہ ان کی جنگ صرف نقاب کے خلاف ہے — ان کا حملہ عورت کے ہر لباس پر ہے۔ انہیں ڈھیلا ڈھالا سادہ حجاب بھی منظور نہیں۔ وہ آہستہ آہستہ اپنے دل کی بغض کو کھول رہے ہیں — کیونکہ ان کا اصل مقصد ہے عورت کی بے حرمتی، اسے اپنی اسکرینوں پر سستا مال بنانا۔ یہی ان کے نزدیک ترقی اور برتری کا تصور ہے — اور جو پردے کو اپنائے، وہ ان کے نزدیک پسماندگی کی علامت۔

یہ لوگ ہر اس چیز کا پرچار کرتے ہیں جس میں فتنہ ہو۔ یہ چاہتے ہیں کہ فحاشی کا بازار گرم ہو۔ اللہ تعالیٰ نے فرمایا:

"بیشک جو لوگ یہ چاہتے ہیں کہ اہلِ ایمان میں بے حیائی پھیلے، ان کے لیے دنیا و آخرت میں دردناک عذاب ہے" (النور: 19)۔

یہ نہ اللہ کے فرمان سے رکتے ہیں نہ رسول ﷺ کی سنت سے۔ اس لیے ان کے مقابلے میں ڈٹ جانا عبادت، فریضہ، اور اجر کا باعث ہے۔ حق کی آواز بلند ہونی چاہیے اور باطل کو کچل دینا چاہیے۔

ہمیں حق ہے کہ پوچھیں: کیا اس امت کے تمام مسائل بس عورت کے نقاب پر آ کر رک گئے ہیں؟ کیا امت کی اصل بیداری کے اسباب — طاقت، اتحاد، علم، اور عزت — اہم نہیں؟ کیا یہ چند گز کا کپڑا ہی ان کی نیندیں اُڑا دیتا ہے؟ ان سب سے بڑھ کر ان کو تکلیف اس وقت ہوتی ہے جب کوئی باپردہ عورت کہتی ہے: “میں نقاب چاہتی ہوں!” اس اعلان کے ساتھ ہی منافق قطار در قطار گرنے لگتے ہیں۔

اور چونکہ اب یہ ظاہر ہو چکا کہ نقاب ان کے لیے کس قدر تکلیف دہ ہے، تو میں اس موقع سے فائدہ اٹھاتے ہوئے تمام مسلمان عورتوں کو دعوت دیتا ہوں کہ وہ اس عظیم فضیلت کو اختیار کریں۔ اپنے چہروں کو نقاب سے معزز بنائیں — خدا کی قسم! جو عورت اخلاص کے ساتھ، اللہ کی رضا کے لیے، فتنہ سے بچنے اور اپنی حفاظت کے لیے نقاب پہنتی ہے، وہ ضرور خیر، برکت اور عزت کے انوار دیکھے گی — جنہیں یہ ہمارے خلاف تلواریں اٹھا کر بھی روک نہ سکیں گے!

اے میری بہن! نقاب پہنو — تم باعزت ہو!

اللہ کے معاملے میں کسی ملامت کرنے والے کی ملامت سے نہ ڈرو۔ واللہ! منافقین تمہارے سامنے مکھیوں کی طرح گر پڑیں گے، تمہاری ہیبت ہر بیمار دل پر زلزلہ بن کر گرے گی۔ نقاب کو دعوت، جہاد، اور صالحات کے لشکر میں اضافے کی نیت سے پہنو۔ یہی فتح ہے — ان خواتین کی فتح جو سلف صالحین کے نقشِ قدم پر چلتی ہیں، اور دینِ خدا پر کسی قسم کی سودے بازی قبول نہیں کرتیں۔ اور یاد رکھو: صرف اس پر ڈٹے رہنا ہی کامیابی ہے!

الحمدللہ! ان حاسدوں کی ہر مہم کے بعد ہمیں شاعر کا قول یاد آتا ہے:

"جب اللہ کسی فضیلت کو عام کرنا چاہے، تو وہ اس کے لیے حسد کرنے والے کی زبان کو ذریعہ بنا دیتا ہے!"

پس وہ اسلام کی ہر نشانی اور ہر فضیلت پر جتنی چاہیں جنگ چھیڑ لیں — یہ اسلام کی دعوت کو صرف اور زیادہ مضبوط، وسیع اور بلند کرے گی۔

"بیشک اللہ فساد کرنے والوں کے عمل کو درست نہیں کرتا" (یونس: 81)۔

اس موقع پر میں سلام پیش کرتا ہوں — عزت، تکریم اور فخر کے ساتھ — ہر اس باحیا باپردہ بہن کو جو کفار کی سرزمین میں بھی اپنے نقاب پر ثابت قدم ہے، کوئی سودا نہیں کرتی، پیچھے نہیں ہٹتی۔ ان کے ثبات پر تکبیر کی صدائیں اور فخر کی لہریں ہیں۔ اللہ نے ہمیں ان باوقار نمونوں کو دیکھنے کی توفیق دی، جو پورے مغرب کو شرمندہ کر دیتے ہیں۔ ان کا استقامت ایک نئی فتح اور امت کے روشن ماضی و حال کا عنوان ہے۔

نقاب شرف ہے! اور اس کی قدر وہی جانتا ہے جس کے پاس شرافت ہو۔ شرافت کے درجے اللہ تقویٰ اور اخلاص سے محفوظ رکھتا ہے۔ یہ بھی ایک وقتی طوفان ہے — جو ناکام اور تھکا ہوا انجام پائے گا، سوائے گندگی اور بھوسے کے کچھ حاصل نہ ہوگا۔ یہ صرف مومن عورتوں کو مزید عزت و استقامت دے گا۔ اور نقاب ہماری چھوٹی بچیوں کی اولین خواہش بنے گا — وہ ایمان سے سرشار ہوں گی، ہر کفر و فحاشی سے لڑنے والی سپاہی بنیں گی۔

جس امت کی عورتیں نمائش میں ہوں اور مرد بزدل ہوں، اسے فتح کا خواب دیکھنے کا حق نہیں!

فتح صرف انہی کو نصیب ہو گی، جو نبی ﷺ اور صحابہ کرام کے طریقے پر ڈٹے رہیں گے — پورے یقین اور فخر کے ساتھ! مسلم مردوں کی صفت غیرت اور شجاعت ہے، اور مسلم خواتین کا تاج حیا اور ستر ہے۔ اور اسی میں عظیم فتح چھپی ہے!

امتِ محمد ﷺ مغرب کی امت نہیں ہے!

یہ وہ بہترین امت ہے جو لوگوں کے لیے نکالی گئی ہے۔ یہ صرف اپنے عقیدے اور نبی ﷺ کے راستے سے ترقی کر سکتی ہے۔ جو بھی اس امت کو تبدیلی کی دعوت دیتا ہے، وہ دراصل اسے کفن پہنا رہا ہے، اس کے تابوت میں کیل ٹھونک رہا ہے۔ ہم شیطان اور دشمنوں کے قدم بہ قدم نہیں چل سکتے — ورنہ دنیا ہماری ہنسی اُڑائے گی۔ ہمیں اپنے دین پر فخر ہے، اور یہی ہماری پہچان ہے۔

اے اللہ! ان کے مکر کو انہی کی گردنوں پر پلٹا دے، اور مسلمانوں کی عورتوں کے دلوں میں حیا اور نقاب کی محبت ڈال دے۔

اے اللہ! ان کے لیے اسلام محبوب بنا دے اور مغرب و نسوانیت کی دعوتوں کو ان کے دلوں سے نکال دے۔

اے اللہ! تیرے وہ بندیاں جو نقاب و حجاب پر ثابت قدمی سے تیری قربت چاہتی ہیں، تُو ان سے قبول فرما اور ہر چالاک دشمن کے مقابلے میں ان کی مدد فرما۔

اے اللہ! تُو ہمارا ولی ہے، ان کا کوئی ولی نہیں — ہمیں اپنی رضا اور معیت سے آنکھیں ٹھنڈی کر دے۔